Інтэрактыўная выстава "Старая паштоўка з навагоднім настроем"
У кабінеце беларускай мовы і літаратуры мы аформілі інтэрактыўную выставу "Старая паштоўка з навагоднім настроем", на якой прадстаўлены навагоднія паштоўкі 1970-1980-х гадоў. Яны расказваюць нам пра гісторыю нашай дзяржавы, пра самыя знакамітыя падзеі тых часоў. А зрабіць выставу інтэрактыўнай нам дапамаглі QR-коды, якія ўтрымліваюць спасылкі на віншаванні, на прэзентацыі і відэа пра навагоднія паштоўкі, на навагоднія песні, пажаданні і талісманы 2021 Новага года.
Гэта зараз Інтэрнэт злучае краіны і кантыненты: за кароткі прамежак часу мы можам звязацца з блізкім нам чалавекам, які жыве за тысячы кіламетраў. А зусім нядаўна павіншаваць са святамі і падзяліцца цёплымі пажаданнямі людзям дапамагалі паштоўкі, якія яны адпраўлялі адзін аднаму.
Рыхтуючыся да выставы, мы даведаліся пра гісторыю навагодняй паштоўкі. Традыцыя адпраўляць навагоднія паштоўкі бярэ свой пачатак у ХІХ ст. Гэты звычай прыйшоў да нас з Англіі. У 1843 годзе англічанін Генры Коўл адправіў сваім сябрам першую калядную паштоўку. Паступова гэтая ідэя стала папулярнай па ўсёй Еўропе, а ў далейшым змагла заваяваць увесь свет.
Памятайце, што віртуальныя паштоўкі знікаюць гэтак жа лёгка, як і з’яўляюцца. Таму, калі вы жадаеце сапраўды надоўга пакінуць часцінку сваёй душы дарагім вам людзям, не лянуйцеся дарыць асабіста ці пасылаць папяровую паштоўку. А яшчэ лепш, калі яна будзе зроблена сваімі рукамі!
