Урок мужнасці "Была такая вёска Шавулічы" для вучняў V-ых класаў
У межах дэкады беларускай мовы і літаратуры 29 красавіка вучні IX“А” класа правялі для пяцікласнікаў урок мужнасці “Была такая вёска Шавулічы…”.
Вучні даведаліся пра трагедыю вёскі Шавулічы, што знаходзіцца недалёка ад нашага пасёлка.Раніцай 7 ліпеня 1943 года час для гэтай вёскі спыніўся: за дапамогу партызанам фашысты ў тры колы акружылі вёску, мужчын заставілі капаць сабе магілы, а потым расстралялі 366 жыхароў, з іх -120 дзяцей. Усе дамы і пабудовы былі спалены. Так вёска Шавулічы, якая складалася з 77 двароў, дзе жыло 94 сям’і, перастала існаваць.
Сёння на месцы спаленай вёскі пабудаваны мемарыяльны комплекс, дзе кожны год 7 ліпеня вельмі мнагалюдна. З усяго Ваўкавыскага раёна і з другіх куточкаў Беларусі збіраюцца людзі, каб ушанаваць памяць загінуўшых жыхароў вёскі Шавулічы.Гэты боль немагчыма зразумець і прыняць. Застаецца толькі памятаць і не забываць, якім коштам нашаму народу дасталася Вялікая Перамога.
Гамоніць радасць сонечнага дня,
Цвітуць сады і прыгажэюць вуліцы.
А тут заўжды лунае цішыня
І гушкае згарэўшыя Шавулічы.
Шчабечуць ластаўкі, сініцы, вераб’і,
Даверліва гняздо пад стрэху тулячы…
Тут хат няма, і стрэх няма на іх.
І гнёзд няма там, дзе былі Шавулічы.
Але жыве і памяць і любоў.
І вера, і надзея лепшай долі…
Да шматпакутнай вёскі зноў і зноў
Прыходзім мы, каб не забыць ніколі.
22 мая пяцікласнікі паедуць на экскурсію ў вёску Шавулічы.
Данешчык Т.В., кіраўнік МА настаўнікаў
беларускай мовы і літаратуры
