Інтэлектуальна-патрыятычная гульня «Збяры Беларусь у сваім сэрцы»
У школе з 11 па 21 красавіка 2016 года праводзіцца дэкада беларускай мовы і літаратуры, прысвечаная Году культуры.
12 красавіка для вучняў 8-х класаў адзінаццацікласнікі правялі інтэлектуальна-патрыятычную гульню «Збяры Беларусь у сваім сэрцы». На пачатку гульні вядучыя запрасілі ўсіх у віртуальнае падарожжа па Беларусі, і дзякуючы сучаснай тэхніцы, прысутныя пабывалі ў самых прыгожых і знакамітых куточках нашай краіны.
Спаборнічалі каманды 8 “В” і 8 “Б” класаў, якія па чарзе выбіралі на гульнёвым полі катэгорыі пытанняў і балы. Удзельнікі дэманстрыравалі сваё веданне роднай мовы, традыцый беларускага народа, гісторыі, геаграфіі роднага краю, культурнай спадчыны Беларусі.
Адзін з тураў быў прысвечаны тэме “2016 год – Год культуры”. Удзельнікі даведаліся, што 2016 год – год значных для Беларусі юбілееў: 125-годдзе з дня нараджэння М.Багдановіча, 75-годдзе з дня нараджэння У.Мулявіна, юбілеі К.Крапівы, І.Шамякіна і іншых знакамітых людзей нашай краіны.
Усе прысутныя яшчэ раз пераканаліся, што наша Беларусь – гэта прыгожая краіна з багатым мінулым, гасцінымі, працавітымі людзьмі, маляўнічай прыродай і вельмі мілагучнай мовай. У нас захаваліся помнікі даўніны, якімі ганарымся не толькі мы, але і ўвесь свет. Гэта Мірскі замак, які ўнесены ў міжнародную скарбніцу ЮНЕСКА, Сынкавіцкая царква абарончага тыпу, Сафійскі сабор у Полацку, нацыянальны гісторыка-культурны запаведнік у Нясвіжы і многія іншыя.
Абедзве каманды з вялікім энтузіязмам адказвалі на пытанні, але перамагла каманда 8 “В” класа.
У заключэнні хочацца сказаць, што можна пражыць жыццё і «не знайсці сваёй Радзімы», не стаць яе патрыётам, які любіць сваю Айчыну не за тое, што яна дае яму нейкія даброты і прывілеі, а таму, што гэта яго Бацькаўшчына.
Мы спадзяемся, што кожны з прысутных на мерапрыемстве знайшоў у сваім сэрцы месца для нашай Беларусі, нашай Бацькаўшчыны.
 |
 |
 |
 |
 |
 |
Гульню падрыхтавала Данешчык Т.В.,
настаўніца беларускай мовы і літаратуры
